OMMAVIY OFERTA

iDonate.uz platformasidan foydalanish shartlari

• Tahrir: 2.0
• Eʼlon qilingan sana: 05.10.2026
• Kuchga kirish sanasi: yangi Foydalanuvchilar uchun — eʼlon qilingan kundan; roʻyxatdan oʻtgan Strimerlar uchun — ularga xabar yuborilganidan 30 kalendar kun oʻtib (22.3-band), yaʼni 04.11.2026 dan; yangi tahrirni Shaxsiy kabinetda undan oldin qabul qilgan Strimerlar uchun — qabul qilingan kundan
• Doimiy manzil: https://idonate.uz/public-offer

Qisqacha (faqat qulaylik uchun; toʻliq shartlar quyida):

• iDonate — strimerlarga donat qabul qilish uchun dasturiy vositalar (donat sahifasi, vidjetlar, TTS va boshqalar) taqdim etadigan platforma. Uning egasi — «CODO IT» MChJ.
• Pulni iDonate emas, Markaziy bank litsenziyasiga ega toʻlov tashkiloti qabul qiladi va strimer ulushini toʻgʻridan-toʻgʻri strimer hisobvaragʻiga oʻtkazadi.
• Komissiya, limitlar va narxlar ushbu matnda emas, Platformada — tariflar sahifasida, shaxsiy kabinetda va toʻlovdan oldin donat sahifasida koʻrsatiladi.
• Donat — ixtiyoriy va begʻaraz hadya. Donatorning ismi (taxallusi), xabari va summasi strimda ommaga koʻrsatilishi mumkin.
• Donat qonunda va 10-boʻlimda koʻrsatilgan hollarda (masalan, takroriy yoki ruxsatsiz toʻlovda) qaytariladi.
• Qonunga zid xabarlar oʻchiriladi. Shartlar yomon tomonga oʻzgarsa, strimerlarga kamida 30 kun oldin xabar beriladi.

1. UMUMIY QOIDALAR

1.1. Ushbu hujjat «CODO IT» masʼuliyati cheklangan jamiyatining (keyingi oʻrinlarda — Operator) https://idonate.uz veb-sayti va unga bogʻliq dasturiy vositalar orqali xizmatlar koʻrsatish boʻyicha har qanday shaxsga qaratilgan rasmiy taklifi — ommaviy ofertasi (keyingi oʻrinlarda — Oferta) hisoblanadi (Oʻzbekiston Respublikasi Fuqarolik kodeksining (keyingi oʻrinlarda — FK) 369-moddasining ikkinchi qismi).

1.2. Oferta 4-boʻlimda belgilangan tartibda aksept qilingan paytdan boshlab Operator va aksept qilgan shaxs oʻrtasida Oferta shartlari asosida shartnoma (keyingi oʻrinlarda — Shartnoma) tuzilgan hisoblanadi (FK 370-moddasi, «Elektron tijorat toʻgʻrisida»gi Qonunning 15- va 19-moddalari). Shartnoma elektron shaklda tuziladi va yozma shaklda tuzilgan shartnomaga tenglashtiriladi.

1.3. Shartnoma qoʻshilish shartnomasi hisoblanadi (FK 360-moddasi): Oferta shartlari faqat toʻliq qabul qilinishi mumkin. Operator va Strimer alohida yozma (shu jumladan elektron) kelishuv bilan ayrim shartlarni individual belgilashi mumkin. Bunday kelishuv oʻzi tartibga soladigan masalalar boʻyicha Ofertadan ustun turadi.

1.4. Quyidagilar Shartnomaning ajralmas qismi hisoblanadi: a) Maxfiylik siyosati — https://idonate.uz/privacy-policy; b) Tariflar — https://idonate.uz/tariflar, shuningdek Shaxsiy kabinetda va Donat sahifasida toʻlovdan oldin koʻrsatiladigan Tarif maʼlumotlari.

1.5. Toʻlovlarni qabul qilish va oʻtkazish Toʻlov tashkiloti bilan toʻlovchi hamda oluvchi oʻrtasidagi munosabat boʻlib, Toʻlov tashkilotining ommaviy ofertasi va qoidalari (https://multicard.uz/offer_payment.html) bilan tartibga solinadi. Bu hujjatlar Operator bilan tuziladigan Shartnomaning qismi emas va Operator ular boʻyicha majburiyat olmaydi.

1.6. Oferta Oʻzbekiston Respublikasining davlat tilida tuzilgan. Boshqa tillardagi matnlar qulaylik uchun beriladi; ular oʻrtasida farq boʻlsa, oʻzbek tilidagi matn qoʻllaniladi.

1.7. Shartnomaga Oʻzbekiston Respublikasi qonunchiligi qoʻllaniladi. Ofertaning hech bir sharti Foydalanuvchining qonunchilik, shu jumladan isteʼmolchilar huquqlarini himoya qilish va shaxsga doir maʼlumotlar toʻgʻrisidagi qonunchilik bilan kafolatlangan huquqlarini cheklovchi deb talqin qilinmaydi. Oferta sharti qonunchilikka zid boʻlsa, qonunchilik normasi qoʻllaniladi.

1.8. Oʻzbekiston Respublikasidan tashqarida turib Platformadan foydalanuvchi shaxs oʻz yashash davlatining qonunchiligiga rioya etishi uchun oʻzi javob beradi.

2. ATAMALAR

2.1. Ofertada quyidagi atamalar quyidagi maʼnolarda qoʻllaniladi:

Operator — «CODO IT» masʼuliyati cheklangan jamiyati (STIR 311366908), Platformaning egasi.

Platforma — https://idonate.uz veb-sayti, uning sahifalari va Vidjetlari, dasturiy interfeyslari (API), Operatorning Telegram botlari (shu jumladan @idonateuzbot) hamda Operator Xizmatlarni koʻrsatish uchun foydalanadigan boshqa dasturiy vositalar.

Xizmatlar — Operator Platforma orqali koʻrsatadigan dasturiy taʼminot va axborot xizmatlari (3-boʻlim).

Foydalanuvchi — Strimer yoki Donator.

Taraflar — Operator va Foydalanuvchi; ulardan har biri alohida — Taraf.

Strimer — Platformada roʻyxatdan oʻtgan jismoniy shaxs (hisob egasi). Donat qabul qilish imkoniyati 5-boʻlimda belgilangan identifikatsiya va moderatsiyadan soʻng ochiladi. Donatlar Strimerga beriladi va Shartnoma boʻyicha barcha majburiyatlar Strimer zimmasida boʻladi.

Kanal yurituvchi — Strimer hisobiga bogʻlangan Kanalda jonli efirni amalda olib boradigan, Strimerning oʻzi boʻlmagan jismoniy shaxs (masalan, oila aʼzosi).

Kanal — Strimerning YouTube, Twitch, Telegram yoki boshqa uchinchi shaxs platformasidagi kanali (sahifasi).

Donator — Donat sahifasi orqali Strimerga Donat yuboradigan shaxs. Donat yuborish uchun roʻyxatdan oʻtish talab qilinmaydi.

Donat — Donatorning Strimerga Platforma orqali, Toʻlov tashkiloti vositasida begʻaraz (tekinga) beradigan pul mablagʻi (hadya, FK 502-moddasi) va unga ilova qilingan Xabar.

Xabar — Donator Donatga ilova qiladigan ism (taxallus), matn, ovozli xabar, mem va boshqa tanlovlar.

Donat sahifasi — Strimerning Platformadagi, Donat yuborish uchun moʻljallangan ommaviy sahifasi.

Vidjet — OBS va shunga oʻxshash efir dasturlariga ulanadigan, Donatlar, Xabarlar, maqsadlar va boshqa maʼlumotlarni jonli efirda koʻrsatadigan Platforma sahifasi.

TTS — Xabar matnini sintez qilingan (sunʼiy) ovozda oʻqib berish funksiyasi.

Shaxsiy kabinet — Strimerning Platformadagi, faqat unga ochiq shaxsiy boʻlimi.

Daraja — Operator Strimerga Platformada eʼlon qilingan mezonlar asosida beradigan toifa. Komissiya, Limitlar va ochiq Toʻlov usullari Darajaga bogʻliq boʻlishi mumkin.

Limit — bitta Donat summasining yoki ayrim Toʻlov usuli orqali toʻlov summasining eng yuqori yoki eng kam chegarasi.

Komissiya — Donat boʻyicha xizmat haqi. U Donat summasidan ushlanadi yoki Donator tanloviga koʻra Donat summasi ustiga qoʻshib toʻlanadi. Komissiya tarkibiga Operator xizmat haqi va Toʻlov tashkiloti (toʻlov tizimlari) xizmat haqi kiradi.

Tariflar — Komissiya, Limitlar, Pullik funksiyalar narxi va boshqa pullik shartlarning amaldagi miqdorlari hamda Darajalar mezonlari. Ular 7.1-bandda koʻrsatilgan joylarda eʼlon qilinadi.

Toʻlov tashkiloti — Oʻzbekiston Respublikasi Markaziy banki litsenziyasiga ega boʻlgan va Donatlarni qabul qilish hamda oʻtkazish boʻyicha toʻlov xizmatlarini koʻrsatadigan «MULTICARD PAYMENT» (25-boʻlim), shuningdek toʻlov sahifasida koʻrsatilgan boshqa litsenziyaga ega toʻlov tashkiloti. Toʻlov tashkiloti bilan hamkorlik qiluvchi banklar va toʻlov tizimlari (Payme, Click, Uzum, Uzcard, Humo, Visa, Mastercard va boshqalar) Donat sahifasida Toʻlov usullari sifatida taqdim etiladi.

Toʻlov usuli — Donat sahifasida taklif etiladigan toʻlov vositasi yoki toʻlov tizimi.

Strimer hisobvaragʻi — Strimerning JSHSHIRiga bogʻlangan, «Rahmat» xizmati orqali aniqlanadigan va Taqsimlangan toʻlovda Strimer ulushi oʻtkaziladigan hisobvaragʻi yoki boshqa toʻlov rekvizitlari. «Rahmat» xizmatini «MULTICARD PAYMENT» aksiyadorlik jamiyati koʻrsatadi; hisobvaraq ushbu xizmatning hamkor bankida ochiladi.

«Rahmat» xizmati — Strimerning JSHSHIRi va telefon raqami boʻyicha uning rasmiy familiyasi, ismi, otasining ismi, oʻzini oʻzi band qilgan shaxs sifatidagi holati va Strimer hisobvaragʻi maʼlumotlarini tekshirish uchun Operator foydalanadigan uchinchi shaxs xizmati.

Taqsimlangan toʻlov (split) — Toʻlov tashkiloti Donat summasini Strimer ulushi va Komissiyaga ajratib, Strimer ulushini bevosita Strimer hisobvaragʻiga oʻtkazadigan hisob-kitob usuli.

Pullik funksiyalar — Platformaning alohida haq evaziga (masalan, obuna asosida) taqdim etiladigan funksiyalari.

Balans — Shaxsiy kabinetdagi, faqat Pullik funksiyalar uchun toʻlashga moʻljallangan hisob yozuvi.

Tasdiqlash kodi — SMS, Telegram bot yoki boshqa kanal orqali yuboriladigan, cheklangan muddat amal qiladigan bir martalik kod.

Kontent — Foydalanuvchi Platformaga joylaydigan yoki Platforma orqali uzatadigan har qanday maʼlumot va material, shu jumladan Xabarlar.

Maxfiylik siyosati — Operatorning shaxsga doir maʼlumotlarga ishlov berish tartibini belgilovchi hujjati (1.4-band).

2.2. Ofertada taʼriflanmagan atamalar Oʻzbekiston Respublikasi qonunchiligidagi maʼnosida, bunday maʼno boʻlmasa — odatiy maʼnosida tushuniladi.

3. OFERTA PREDMETI

3.1. Operator Foydalanuvchiga Platformadan foydalanish imkoniyatini beradi, Foydalanuvchi esa Platformadan Oferta shartlariga muvofiq foydalanadi. Xizmatlar tarkibiga, xususan, quyidagilar kiradi: a) Donat sahifasi va Donatlar haqidagi maʼlumotni Strimerga yetkazish; b) Vidjetlar va Donat haqida jonli efirdagi bildirishnomalar; c) TTS, ovozli xabarlar va memlarni koʻrsatish; d) maqsadlar (yigʻim shkalasi), Donat gʻildiragi, Lotlar (ovoz berish), «Top donatorlar» roʻyxati va boshqa interaktiv vositalar; e) Donatlar tarixi va statistikasi; f) Kanalni tasdiqlash, Telegram botlari orqali bildirishnomalar; g) YouTube va boshqa platformalar bilan ixtiyoriy integratsiya; h) tomoshabinlar faolligi uchun ballar moduli; i) Pullik funksiyalar.

3.2. Xizmatlarning amaldagi tarkibi va tavsifi Platformada koʻrsatiladi. Operator Xizmatlarni takomillashtirishi va yangi funksiyalar qoʻshishi mumkin. Mavjud funksiyani olib tashlash yoki uni pullik qilish 22-boʻlimda belgilangan tartibda amalga oshiriladi.

3.3. Operator toʻlov xizmatlarini koʻrsatmaydi va toʻlov agenti (subagenti) emas. Operator Donat mablagʻlarini oʻz hisobvaragʻiga qabul qilmaydi, saqlamaydi va Strimerga oʻtkazmaydi. Donatlarni Toʻlov tashkiloti oʻz litsenziyasi va qoidalari asosida qabul qiladi hamda Strimer ulushini Strimer hisobvaragʻiga oʻtkazadi. Operator Toʻlov tashkilotidan faqat oʻz xizmat haqini oladi.

3.4. Donat Donator va Strimer oʻrtasidagi hadya munosabati boʻlib, Operator uning tarafi emas. Donat evaziga Strimer Donatorga tovar berish, ish bajarish, xizmat koʻrsatish yoki boshqa qarshi majburiyatni olmaydi. Xabarni jonli efirda koʻrsatish Platformaning texnik imkoniyati boʻlib, Donat uchun qarshi majburiyat hisoblanmaydi.

3.5. Operator jonli efirlarni joylashtirmaydi va uzatmaydi. Jonli efirlar Kanallarda, tegishli uchinchi shaxs platformalarining qoidalari asosida olib boriladi.

4. AKSEPT, SHARTNOMA TUZILISHI VA YOSH TALABLARI

4.1. Strimer Ofertani quyidagi harakatlarni birgalikda bajarish orqali aksept qiladi: roʻyxatdan oʻtish shaklida yoki Operatorning rasmiy Telegram botida Oferta va Maxfiylik siyosatiga rozilik belgisini qoʻyish (rozilik tugmasini bosish) hamda roʻyxatdan oʻtishni Tasdiqlash kodi bilan yoki Telegram hisobi orqali tasdiqlash bilan yakunlash. Operator aksept qilingan sana, vaqt, usul va hujjatlar tahririni qayd etadi. Donat qabul qilish imkoniyati 5-boʻlimda belgilangan identifikatsiya va moderatsiyadan soʻng ochiladi.

4.2. Donator Ofertani Donat sahifasidagi, yonida Oferta va Maxfiylik siyosatiga havola joylashgan Donat yuborish tugmasini bosish va toʻlovni amalga oshirish orqali aksept qiladi. Donator bilan Shartnoma har bir Donat boʻyicha alohida tuziladi va unga Donat yuborilgan paytda amalda boʻlgan Oferta tahriri qoʻllaniladi.

4.3. Platforma sahifalarini koʻrish, ular bilan tanishish yoki sukut saqlash aksept hisoblanmaydi.

4.4. Akseptni chaqirib olish (FK 371-moddasi; «Elektron tijorat toʻgʻrisida»gi Qonunning 16-moddasi): Strimer roʻyxatdan oʻtish yakunlanguncha, Donator esa toʻlov tasdiqlanguncha jarayonni toʻxtatib (sahifani yopib) akseptni chaqirib olishi mumkin; bunda aksept olinmagan hisoblanadi. Aksept qilingandan keyin Strimer Shartnomani 17-boʻlimda belgilangan tartibda bekor qilishi mumkin; toʻlangan Donat faqat 10-boʻlimda nazarda tutilgan hollarda qaytariladi.

4.5. Strimer 18 yoshga toʻlgan va toʻliq muomala layoqatiga ega jismoniy shaxs boʻlishi kerak. 18 yoshga toʻlmagan shaxs Platformadan faqat Kanal yurituvchi sifatida, uning ota-onasi yoki boshqa qonuniy vakili Strimer (hisob egasi) boʻlgan holda foydalanishi mumkin (5.5-band).

4.6. 18 yoshga toʻlmagan Donator Donatni faqat ota-onasi (qonuniy vakili) roziligi bilan va qonunchilikda voyaga yetmaganlarga ruxsat etilgan doirada amalga oshiradi (FK 27- va 29-moddalari). Donat yuborish orqali Donator ushbu talabga rioya qilganini tasdiqlaydi. Voyaga yetmagan shaxsning Donati qonunchilikda belgilangan asoslarda haqiqiy emas deb topilsa (FK 117- va 118-moddalari), 10-boʻlim qoʻllaniladi.

5. STRIMERNI ROʻYXATDAN OʻTKAZISH, IDENTIFIKATSIYA VA HISOB

5.1. Roʻyxatdan oʻtish va Platformaga kirish telefon raqami va SMS orqali yuboriladigan Tasdiqlash kodi yoki Operatorning Telegram boti (@idonateuzbot) orqali amalga oshiriladi. Google hisobini ilgari Platformadagi hisobiga bogʻlagan Strimer Google hisobi orqali ham kirishi mumkin; Google orqali yangi hisob ochilmaydi. Strimer faqat oʻziga tegishli telefon raqami, Telegram va Google hisoblaridan foydalanadi.

5.2. Donat qabul qilishni yoqish uchun Strimer oʻzining JSHSHIRini (jismoniy shaxsning shaxsiy identifikatsiya raqamini) kiritadi. Operator JSHSHIR va telefon raqamini «Rahmat» xizmati orqali tekshiradi. Tekshiruv natijasida olingan rasmiy familiya, ism, otasining ismi va Strimer hisobvaragʻi maʼlumotlari hisobga yoziladi.

5.3. Identifikatsiyadan soʻng JSHSHIR va rasmiy familiya, ism, otasining ismi Strimer tomonidan mustaqil oʻzgartirilmaydi. Ular notoʻgʻri boʻlsa, Strimer Operatorga murojaat qiladi va maʼlumotlar tasdiqlovchi hujjatlar asosida tuzatiladi. Strimerning rasmiy familiyasi, ismi, otasining ismi va JSHSHIRi Donat sahifasida ommaga koʻrsatilmaydi; ular faqat qonunchilik talab qilgan hollarda (masalan, fiskal chekda) koʻrsatilishi mumkin.

5.4. Donat qabul qilish uchun Strimer qonunchilikka muvofiq oʻzini oʻzi band qilgan shaxs sifatida roʻyxatdan oʻtgan va bu maqomi «Rahmat» xizmati orqali tasdiqlangan boʻlishi, shuningdek Donatlarni qabul qilish davrida bu maqomni va Strimer hisobvaragʻini faol holatda saqlashi shart. Maqom yoki Strimer hisobvaragʻi toʻxtatilsa, Donat qabul qilish ham toʻxtatilishi mumkin.

5.5. Kanalni Strimerning oʻzi emas, boshqa shaxs yuritsa, Strimer buni Platformada koʻrsatadi va Kanal yurituvchining familiyasi, ismi, otasining ismi va qarindoshlik munosabatini kiritadi. Bunda Strimer: a) Kanal yurituvchining (u voyaga yetmagan boʻlsa — qonuniy vakil sifatida oʻzining) roziligini olganini tasdiqlaydi; b) Donatlar Strimer hisobvaragʻiga tushishini va soliq majburiyatlari Strimer zimmasida ekanini tan oladi; c) Kanal yurituvchining Platformadagi va jonli efirdagi harakatlari uchun Operator oldida oʻz harakatlari kabi javob beradi.

5.6. Strimer Kanalga egalik qilishini Platforma koʻrsatgan usulda (masalan, Kanal tavsifiga tasdiqlash kodini joylash yoki skrinshot yuborish orqali) tasdiqlaydi. Arizani Operator koʻrib chiqadi va tasdiqlaydi yoki sababini koʻrsatib rad etadi. Kamchilik bartaraf etilgach, ariza qayta yuborilishi mumkin.

5.7. Bir shaxs, Operator ruxsatisiz, faqat bitta hisob ochadi. Hisob, Donat sahifasi va Vidjet havolalarini boshqa shaxsga berish, sotish yoki ijaraga berish taqiqlanadi.

5.8. Tasdiqlash kodlari, Vidjet (OBS) havolalari va tokenlar maxfiy hisoblanadi. Strimer ularni boshqa shaxslarga bermaydi va ishonchsiz dasturlarga joylamaydi. Hisobga ruxsatsiz kirilgani yoki havola oshkor boʻlganidan xabar topsa, Strimer darhol Operatorga xabar beradi; Operator havolani yangilash, seanslarni toʻxtatish kabi choralar koʻradi. Strimer oʻz aybi bilan maxfiy maʼlumotlar oshkor boʻlishi oqibatlari uchun oʻzi javob beradi; Operator oʻz tizimlari xavfsizligini taʼminlamaganligi oqibatlari uchun qonunchilikka muvofiq javob beradi.

5.9. Strimer telefon raqami, Kanal va boshqa maʼlumotlarini dolzarb holatda saqlaydi. Telefon raqamini oʻzgartirish Tasdiqlash kodi orqali amalga oshiriladi.

5.10. Foydalanuvchi nomi (username) Donat sahifasi manzilida ishlatiladi. Operator boshqa shaxslarning huquqlarini buzadigan, chalgʻituvchi yoki haqoratli foydalanuvchi nomini oʻzgartirishni talab qilishi mumkin. Firibgarlikning oldini olish uchun avvalgi foydalanuvchi nomlari saqlanadi va boshqa Strimerga berilmasligi mumkin.

6. DARAJALAR, LIMITLAR VA TOʻLOV USULLARI

6.1. Har bir Strimerga Daraja beriladi. Darajalar roʻyxati, har bir Daraja uchun Komissiya, Limitlar, ochiq Toʻlov usullari va keyingi Darajaga oʻtish mezonlari Tariflarda va Shaxsiy kabinetda eʼlon qilinadi.

6.2. Yangi Strimerga boshlangʻich Daraja beriladi.

6.3. Keyingi Darajaga oʻtish mezonlari bajarilganda Platforma Darajani oshirish soʻrovini avtomatik shakllantiradi va uni Operator xodimi koʻrib chiqadi. Darajani oshirish yoki oshirishni rad etish toʻgʻrisidagi qaror faqat avtomatlashtirilgan tarzda qabul qilinmaydi. Rad etilsa, keyingi soʻrov Operator belgilagan muddat oʻtgach avtomatik shakllantiriladi. Strimer rad etish sababini 21.3-bandda belgilangan tartibda soʻrashi va qaror ustidan eʼtiroz bildirishi mumkin.

6.4. Operator Strimer Darajasini pasaytirishi, Limitlarni kamaytirishi yoki ayrim Toʻlov usullarini yopishi mumkin, faqat quyidagi hollarda: a) Strimer Oferta yoki qonunchilikni buzganda; b) Strimerga kelgan toʻlovlar koʻp marta bekor qilinganda yoki nizolashtirilganda (chargeback) yoxud firibgarlik belgilari aniqlanganda; c) mezonlar sunʼiy ravishda bajarilganda (masalan, oʻziga oʻzi yoki kelishilgan holda Donat qilish orqali); d) Toʻlov tashkiloti, sud yoki vakolatli davlat organi talab qilganda.

Operator Strimerni koʻrilgan chora va uning sababi haqida xabardor qiladi. Strimer 12.5-bandda belgilangan tartibda eʼtiroz bildirishi mumkin.

6.5. Mezonlarning oʻzgarishi allaqachon berilgan Darajani pasaytirishga asos boʻlmaydi, 6.4-bandda nazarda tutilgan hollar bundan mustasno.

6.6. Bitta Donat summasi Strimer Darajasi va Toʻlov usuliga bogʻliq eng yuqori chegara bilan cheklanadi; ayrim Toʻlov usullari uchun alohida chegaralar belgilanishi mumkin. Amaldagi chegaralar Donat sahifasida toʻlovdan oldin koʻrsatiladi va chegaradan oshgan toʻlov qabul qilinmaydi. Strimer Xabar turlari (matn, TTS, ovozli xabar, mem) uchun eng kam Donat summasini belgilashi mumkin; u ham Donat sahifasida koʻrsatiladi.

6.7. Toʻlov usullarining mavjudligi Darajaga hamda Toʻlov tashkiloti va toʻlov tizimlarining shartlariga bogʻliq. Operator xavfsizlik, texnik sabablar yoki Toʻlov tashkiloti talabi bilan Toʻlov usulini vaqtincha oʻchirishi mumkin; bu Shartnomani buzish hisoblanmaydi. Operator ayrim Strimerlarga individual asosda qoʻshimcha Toʻlov usullarini ochishi mumkin.

7. KOMISSIYA, TARIFLAR VA HISOB-KITOBLAR

7.1. Oferta matnida Komissiya va boshqa Tariflarning aniq miqdorlari koʻrsatilmaydi. Amaldagi Tariflar quyidagi joylarda eʼlon qilinadi va Ofertaning ajralmas qismi hisoblanadi: a) Tariflar sahifasida (1.4-band); b) Strimer uchun — Shaxsiy kabinetda; c) Donator uchun — Donat sahifasida, toʻlov tasdiqlanishidan oldin (Komissiya miqdori va toʻlanadigan yakuniy summa).

7.2. Komissiya miqdori Strimer Darajasi, Toʻlov usuli va Toʻlov tashkiloti bilan ulanish shartlariga bogʻliq boʻlishi mumkin. Har bir Donatga toʻlov amalga oshirilgan paytda amalda boʻlgan Tarif qoʻllaniladi.

7.3. Komissiya Operator va Toʻlov tashkiloti xizmatlari uchun toʻlanadi. U Strimer hisobidan toʻlanadi va Toʻlov tashkiloti tomonidan hisob-kitob jarayonida Donat summasidan ushlanadi, 7.4-bandda nazarda tutilgan hol bundan mustasno.

7.4. Donator Donat sahifasida Komissiyani oʻzi toʻlashni tanlasa, Komissiya Donat summasi ustiga qoʻshiladi va Strimer Donator kiritgan summani Komissiya ushlanmagan holda oladi. Bunda Donator Strimer uchun Komissiyani ixtiyoriy ravishda toʻlagan hisoblanadi (FK 241-moddasining ikkinchi qismi). Toʻlanadigan yakuniy summa toʻlovdan oldin koʻrsatiladi. Donatorning tanlovi uning qurilmasida keyingi Donatlar uchun eslab qolinishi mumkin; Donator uni har safar oʻzgartira oladi.

7.5. Hisob-kitoblar Taqsimlangan toʻlov (split) usulida amalga oshiriladi: Toʻlov tashkiloti Donatni qabul qiladi, Strimer ulushini bevosita Strimer hisobvaragʻiga, Komissiyani esa Operator va Toʻlov tashkiloti hisobiga oʻtkazadi. Mablagʻlarni oʻtkazish muddatlari Toʻlov tashkiloti qoidalari bilan belgilanadi. Operator Strimer ulushini ushlab qolmaydi, kechiktirmaydi va hisobdan chiqarmaydi.

7.6. Toʻlov tashkiloti qonunchilikka muvofiq elektron fiskal chek beradi. Chekda Strimer ulushi va Komissiya alohida koʻrsatilishi, shuningdek Strimerni aniqlovchi maʼlumotlar (foydalanuvchi nomi, qonunchilik talab qilgan hollarda — familiyasi, ismi, otasining ismi yoki JSHSHIR) koʻrsatilishi mumkin. Chekda Strimer ulushi qatorida Strimer (JSHSHIR boʻyicha), Komissiya qatorida esa Operator (STIR boʻyicha) komitent sifatida koʻrsatiladi.

7.7. Donat 10.2-bandning «a» yoki «c» kichik bandlari asosida qaytarilganda Donatorga u toʻlagan butun summa, shu jumladan Komissiya, qaytariladi. Qaytarish bilan bogʻliq xarajatlar Donatorga yuklatilmaydi («Elektron tijorat toʻgʻrisida»gi Qonunning 27-moddasi). Boshqa asoslarda qaytarishda Komissiya qonunchilik va Toʻlov tashkiloti qoidalariga muvofiq qaytariladi.

7.8. Strimer Donatlardan olingan daromad boʻyicha soliqlarni qonunchilikka muvofiq mustaqil toʻlaydi va soliq maqomini saqlaydi. Qonunchilikda soliq agenti vazifasi Toʻlov tashkiloti, Operator yoki boshqa shaxsga yuklatilgan hollarda soliq shu shaxs tomonidan ushlab qolinadi. Operator qonunchilikda nazarda tutilgan maʼlumotlarni vakolatli organlarga taqdim etadi. Operator Strimerning soliq majburiyatlari uchun, qonunchilikda bevosita nazarda tutilgan hollardan tashqari, javob bermaydi.

7.9. Tariflarni oʻzgartirish 22-boʻlimda belgilangan tartibda amalga oshiriladi. Tariflar oʻzgarishi oʻzgarish kuchga kirgunga qadar amalga oshirilgan Donatlarga qoʻllanilmaydi.

8. PULLIK FUNKSIYALAR VA BALANS

8.1. Pullik funksiyalar roʻyxati, narxi, obuna muddatlari va imtiyozlari obuna sahifasida toʻlovdan oldin koʻrsatiladi.

8.2. Hozirda Pullik funksiyalar bepul taqdim etiladi (Tariflar sahifasi). Pullik funksiyalar uchun haq olish 22.3-bandda belgilangan tartibda, kamida 30 kalendar kun oldin xabar berilgan holda va faqat Strimer roziligi bilan boshlanadi. Toʻlov usuli obuna sahifasida koʻrsatiladi. Toʻlangan summa Balansga yoziladi va obuna muddati tegishli ravishda uzaytiriladi.

8.3. Obuna avtomatik uzaytirilmaydi va Strimerning toʻlov vositasidan uning har safargi roziligisiz mablagʻ yechilmaydi. Obuna muddati tugagach, Pullik funksiyalar oʻchadi.

8.4. Operator bepul sinov muddatini taklif qilishi mumkin. Uning muddati va shartlari obuna sahifasida koʻrsatiladi. Sinov muddati tugagach, toʻlov qilinmasa, Pullik funksiyalar oʻchadi.

8.5. Balans faqat Operatorning Pullik funksiyalari uchun ishlatiladi. U naqd pulga almashtirilmaydi, boshqa Foydalanuvchiga oʻtkazilmaydi, Donat sifatida ishlatilmaydi va elektron pul hisoblanmaydi.

8.6. Qaytarish: a) Pullik funksiya Operator aybi bilan koʻrsatilmagan davr uchun — Strimerning tanloviga koʻra obuna muddati uzaytiriladi yoki mutanosib summa qaytariladi; b) ortiqcha yoki xato toʻlangan summa qaytariladi; c) Shartnoma bekor qilinganda Balansdagi foydalanilmagan summa Strimer murojaatiga koʻra qaytariladi; d) boshqa hollarda boshlangan obuna davri uchun toʻlangan summa qaytarilmaydi, qonunchilikda boshqacha tartib belgilangan hollar bundan mustasno.

Qaytarish murojaat qabul qilinganidan keyin 10 kalendar kun ichida toʻlov amalga oshirilgan toʻlov vositasiga (bu imkonsiz boʻlsa — Strimer koʻrsatgan hisobvaraqqa) amalga oshiriladi. Mablagʻning tushish muddati bank va toʻlov tizimiga bogʻliq boʻlishi mumkin.

8.7. Pullik funksiya narxining oʻzgarishi allaqachon toʻlangan davrga taʼsir qilmaydi.

9. DONAT QILISH SHARTLARI

9.1. Donat ixtiyoriy va begʻaraz. Donat evaziga Strimer yoki Operatordan tovar, xizmat, yutuq yoki boshqa qarshi majburiyat talab qilinmaydi.

9.2. Donat yuborish uchun Donator Donat sahifasida ism yoki taxallusni (boʻsh qoldirilsa, «Anonim» koʻrsatiladi), Xabarni, summani, Toʻlov usulini va Komissiya boʻyicha tanlovini kiritadi, toʻlanadigan yakuniy summa bilan tanishadi va Toʻlov tashkiloti sahifasida toʻlovni amalga oshiradi. Toʻlov muvaffaqiyatli yakunlangach, Donat Strimerga berilgan hisoblanadi va Xabar Strimerga yetkaziladi. Donat sahifasidagi aksept, toʻlovni tasdiqlash va elektron chek Donator va Strimer oʻrtasidagi hadya shartnomasining yozma (elektron) shakli hisoblanadi; Donator va Strimer Ofertani aksept qilish orqali buni tan oladi (FK 504-moddasi; «Elektron tijorat toʻgʻrisida»gi Qonunning 14- va 15-moddalari).

9.3. Donator quyidagilarni tushunadi va ularga rozilik bildiradi: a) Donator kiritgan ism (taxallus), Xabar matni, ovozli xabar, tanlangan mem va Donat summasi Strimerning jonli efirida, Vidjetlarda (shu jumladan «Top donatorlar», maqsad, gʻildirak va lot vidjetlarida) hamda Strimerning Platformadagi ommaviy sahifalarida koʻrsatilishi, eshittirilishi va TTS orqali oʻqib berilishi mumkin; b) jonli efir yozuvlari Strimer qarori bilan uchinchi shaxs platformalarida saqlanishi mumkin; Operator bunday yozuvlarni boshqarmaydi va ularni oʻchira olmaydi; c) shu sababli Donator Xabarda oʻzining va boshqa shaxslarning shaxsiy maʼlumotlarini (familiyasi, telefon raqami, manzili, hujjat maʼlumotlari va hokazo) koʻrsatmasligi kerak.

9.4. Operator Donatorning telefon raqamini va toʻlov vositasi rekvizitlarini Strimerga bermaydi. Toʻlov tashkiloti Operatorga uzatadigan toʻlov maʼlumotlariga Maxfiylik siyosatida koʻrsatilgan maqsadlarda ishlov beriladi.

9.5. Xabarning koʻrsatilishi kafolatlanmaydi. Strimer va Operator Xabarlarni filtrlash (taqiqlangan soʻzlar), qoʻlda tasdiqlash, TTS, ovozli xabar yoki memlarni oʻchirish yoki Xabarni koʻrsatmaslik huquqiga ega; Strimer Donat vaqtida efirda boʻlmasligi mumkin. Bu holatlar Donatni qaytarishga asos boʻlmaydi. Xabar texnik nosozlik sababli Strimerga umuman yetkazilmagan hollar 10.2-bandning «c» kichik bandi bilan tartibga solinadi.

9.6. TTS Xabar matnini sintez qilingan ovozda oʻqiydi. Buning uchun Xabar matni Maxfiylik siyosatida koʻrsatilgan ovoz sintezi xizmatlariga, shu jumladan xorijiy xizmatlarga uzatilishi mumkin. Talaffuzdagi noaniqliklar va qisqa kechikishlar ovoz sintezi texnologiyasining xususiyati hisoblanadi.

9.7. Ovozli xabarda Donator faqat oʻz ovozini yozadi. Boshqa shaxsning ovozini uning roziligisiz yozish, mualliflik huquqi bilan himoyalangan musiqa yoki boshqa asarlarni joylash taqiqlanadi. Ovozli xabarning hajmi va davomiyligi Platformada cheklanadi.

9.8. Memlar Platformadagi toʻplamdan tanlanadi. Memni koʻrsatish uchun eng kam Donat summasi Donat sahifasida koʻrsatiladi.

9.9. Gʻildirak va Lotlar koʻngilochar va ovoz berish vositalaridir. Donat qilish Donatorga yutuq yoki boshqa mulkiy manfaat olish huquqini bermaydi (11.3-bandning «b» kichik bandi).

9.10. Ballar moduli yoqilgan boʻlsa, ballar tomoshabinlar faolligini hisobga olish uchun shartli birliklar boʻlib, pul qiymatiga ega emas, pulga almashtirilmaydi va sotilmaydi.

9.11. Donator faqat oʻziga tegishli yoki egasining ruxsati bilan foydalanayotgan toʻlov vositasidan foydalanadi, jinoiy yoʻl bilan olingan mablagʻlardan foydalanmaydi va oʻzini boshqa shaxs sifatida tanishtirmaydi.

10. DONATNI QAYTARISH TARTIBI

10.1. Donat toʻlov muvaffaqiyatli yakunlangan paytda Strimerga berilgan hisoblanadi va umumiy qoidaga koʻra qaytarilmaydi.

10.2. Donat yoki uning tegishli qismi quyidagi hollarda qaytariladi: a) texnik nosozlik sababli bitta toʻlov takroran yoki ortiqcha summada yechilganda; b) toʻlov vositasidan egasining ruxsatisiz foydalanilganda — qonunchilik va Toʻlov tashkiloti qoidalarida belgilangan tartibda; c) toʻlov amalga oshirilgan, lekin texnik nosozlik sababli Donat Strimerga yetkazilmagan va uni yetkazish imkoni boʻlmaganda; d) Donat sud tomonidan haqiqiy emas deb topilganda yoki qonunchilikda nazarda tutilgan boshqa hollarda.

10.3. Qaytarish uchun Donator Operatorga (25-boʻlimda koʻrsatilgan aloqa kanallari orqali) yoki Toʻlov tashkilotiga murojaat qiladi va toʻlov sanasi, summasi, Strimerning foydalanuvchi nomi, Toʻlov usulini hamda imkoni boʻlsa, chek yoki toʻlov identifikatorini koʻrsatadi.

10.4. Operator murojaatni 10 ish kuni ichida koʻrib chiqadi va natijasini Donatorga maʼlum qiladi. Qaytarish asosli boʻlsa, Operator 3 ish kuni ichida Toʻlov tashkilotiga qaytarish uchun zarur maʼlumotlarni yuboradi. Qaytarishni Toʻlov tashkiloti, qoida tariqasida, toʻlov amalga oshirilgan toʻlov vositasiga, oʻz qoidalarida belgilangan muddatlarda amalga oshiradi. Rad etilganda Operator sababini koʻrsatadi.

10.5. Qaytarilishi lozim boʻlgan summa Strimer hisobvaragʻiga oʻtkazilgan boʻlsa, Strimer uni qaytarishi shart (FK 1023-moddasi). Strimer bunday hollarda Toʻlov tashkiloti tomonidan qonunchilik va uning qoidalariga muvofiq koʻriladigan choralarga (tranzaksiyani bekor qilish, chargeback) rozilik bildiradi va hamkorlik qiladi. Operator Strimerga tegishli mablagʻlarni oʻzi ushlab qolmaydi.

10.6. Donatorning qonunchilikda, shu jumladan isteʼmolchilar huquqlarini himoya qilish toʻgʻrisidagi qonunchilikda belgilangan boshqa huquqlari cheklanmaydi.

10.7. Pullik funksiyalar uchun toʻlovlarni qaytarish 8.6-band bilan tartibga solinadi.

11. TAQIQLANGAN KONTENT VA HARAKATLAR

11.1. Foydalanuvchi Platformadan, Xabarlardan, Donat sahifasi va Vidjetlardan quyidagi maqsadlarda foydalanmaydi (a–m va q kichik bandlari — «Axborotlashtirish toʻgʻrisida»gi Qonunning 12¹-moddasi birinchi qismi; n–p kichik bandlari — Operator qoidalari): a) konstitutsiyaviy tuzumni zoʻrlik bilan oʻzgartirishga, Oʻzbekiston Respublikasi hududiy yaxlitligini buzishga chaqirish; b) ommaviy tartibsizliklarga, fuqarolarga nisbatan zoʻravonlikka chaqirish; c) urush, zoʻravonlik va terrorizmni, diniy ekstremizm, separatizm va fundamentalizm gʻoyalarini targʻib qilish; d) milliy, irqiy, etnik yoki diniy adovat qoʻzgʻatish; e) shaxsning shaʼni, qadr-qimmati yoki ishchanlik obroʻsiga putur yetkazuvchi (shu jumladan haqorat va tuhmat), shaxsiy hayotga aralashishga yoʻl qoʻyuvchi axborotni tarqatish; f) jamoat tartibi yoki xavfsizligiga tahdid soluvchi, bila turib yolgʻon axborotni tarqatish; g) jamiyat, davlat va davlat ramzlariga hurmatsizlik ifodalovchi, shu jumladan odobsiz shakldagi axborotni tarqatish; h) giyohvandlik vositalari, psixotrop moddalar va prekursorlarni targʻib qilish; i) pornografiya, zoʻravonlik va shafqatsizlik kultini targʻib qilish, oʻz joniga qasd qilishga undash; j) fuqarolarni, shu jumladan voyaga yetmaganlarni hayoti yoki sogʻligʻiga xavf soluvchi gʻayriqonuniy harakatlarga undash; k) davlat sirlari yoki qonun bilan qoʻriqlanadigan boshqa sirni oshkor qilish; l) boshqa shaxslarning shaxsga doir maʼlumotlarini qonunga xilof oshkor qilish, shu jumladan sunʼiy intellekt texnologiyalaridan foydalanib shaxsga doir maʼlumotlarga (boshqa shaxsning ovozi yoki qiyofasiga) qonunga xilof ishlov berish va ularni tarqatish; m) boshqa shaxslarning intellektual mulk obyektlaridan qonunga xilof foydalanish; n) litsenziyaga ega boʻlmagan qimor, lotereya, garov oʻyinlari va tavakkalchilikka asoslangan boshqa oʻyinlarni, firibgarlik sxemalari va moliyaviy piramidalarni reklama qilish yoki targʻib qilish; o) Strimer ruxsatisiz reklama, spam va havolalar tarqatish; p) boshqa shaxsga tahdid qilish yoki uni taʼqib qilish, boshqa shaxs (shu jumladan Operator, Strimer, davlat organi yoki mansabdor shaxs) nomidan oʻzini tanishtirish yoki boshqalarni chalgʻitish; q) qonunchilikka muvofiq jinoiy yoki boshqa javobgarlikka sabab boʻladigan boshqa harakatlar.

11.2. Foydalanuvchi, shuningdek, quyidagilarni qilmaydi: a) Platformaga ruxsatsiz kirish, uning zaifliklaridan foydalanish, himoya vositalarini (shu jumladan bot-himoyani) chetlab oʻtish; b) avtomatlashtirilgan vositalar orqali Platformaga ortiqcha yuklama berish yoki Platforma maʼlumotlarini ommaviy yigʻish; c) zararli dasturlarni tarqatish; d) boshqa Foydalanuvchilarning hisoblariga ruxsatsiz kirish, ularning Tasdiqlash kodlarini yoki Vidjet havolalarini egallab olish; e) jinoiy faoliyatdan olingan daromadlarni legallashtirish, terrorizmni moliyalashtirish yoki boshqa toʻlovlarni Donat koʻrinishida yashirish uchun Platformadan foydalanish.

11.3. Strimer, shuningdek: a) Donat qilishga majburlamaydi, tahdid yoki tovlamachilik bilan Donat talab qilmaydi; b) Gʻildirak, Lotlar va boshqa funksiyalardan pul yoki boshqa mulkiy qiymatga ega yutuq oʻynaladigan lotereya, qimor yoki tavakkalchilikka asoslangan boshqa oʻyinlarni tashkil etish uchun foydalanmaydi (FK 983- va 984-moddalari); c) Donatlardan tovar sotish, xizmat koʻrsatish, qarzni qaytarish yoki boshqa haq evaziga toʻlovlarni qabul qilish vositasi sifatida foydalanmaydi; d) Donatlarni boshqa shaxslar uchun xayriya yigʻimi sifatida qonunchilik talablariga rioya qilmasdan taqdim etmaydi va yigʻilayotgan mablagʻ maqsadi haqida Donatorlarni chalgʻitmaydi; e) oʻziga oʻzi yoki kelishilgan holda Donat qilish orqali Daraja mezonlarini sunʼiy bajarmaydi; f) Donatorlar haqidagi maʼlumotlardan Platforma funksiyalaridan tashqarida foydalanmaydi va ularni tarqatmaydi; g) Kanal joylashgan uchinchi shaxs platformalarining qoidalariga rioya qiladi.

11.4. Strimer oʻz Kanalida koʻrsatiladigan Xabarlar uchun axborot resursi egasi sifatida «Axborotlashtirish toʻgʻrisida»gi Qonunning 12¹-moddasida belgilangan majburiyatlarni bajaradi va Platformaning moderatsiya vositalaridan foydalanadi.

12. MODERATSIYA, SHIKOYATLAR VA CHORALAR

12.1. Operator Platformani qonunchilikda belgilangan tartibda monitoring qiladi. 11-boʻlimga zid Kontent aniqlanganda yoki u haqida xabar olinganda Operator uni zudlik bilan oʻchiradi yoki koʻrsatilishini cheklaydi.

12.2. Har qanday shaxs, shu jumladan huquq egasi, 25-boʻlimda koʻrsatilgan aloqa kanallari orqali Kontent ustidan shikoyat yuborishi mumkin. Shikoyatda shikoyatchining aloqa maʼlumotlari, Kontentning havolasi yoki tavsifi va buzilgan huquq koʻrsatiladi. Operator shikoyatni koʻrib chiqadi, asosli boʻlsa, Kontentni oʻchiradi yoki cheklaydi va shikoyatchiga natijani maʼlum qiladi.

12.3. Qoidabuzarlik aniqlanganda Operator uning ogʻirligi, takrorlanishi va oqibatlariga mutanosib ravishda quyidagi choralardan birini yoki bir nechtasini qoʻllashi mumkin: a) ogohlantirish; b) Kontentni oʻchirish yoki yashirish; c) ayrim funksiyalarni (TTS, ovozli xabarlar, memlar va boshqalar) cheklash; d) Darajani pasaytirish yoki Limitlarni kamaytirish (6.4-band); e) Donat qabul qilishni vaqtincha toʻxtatish (17.3-band); f) Shartnomani bekor qilish (17.4-band).

12.4. Operator chora koʻrganda Strimerni chora, uning sababi va eʼtiroz bildirish tartibi haqida xabardor qiladi. Bu qonunchilik talabiga zid boʻlgan yoki tergovga toʻsqinlik qiladigan hollar bundan mustasno.

12.5. Strimer chora haqida xabar olgan kundan boshlab 30 kalendar kun ichida Operatorga eʼtiroz bildirishi mumkin. Operator eʼtirozni 10 ish kuni ichida koʻrib chiqadi va asoslantirilgan javob beradi. Eʼtiroz tartibi sudga murojaat qilish huquqini cheklamaydi.

12.6. Operator sud va vakolatli davlat organlarining qonuniy talablarini, shu jumladan Kontentni oʻchirish, maʼlumot taqdim etish yoki kirishni cheklash haqidagi talablarini bajaradi.

13. INTELLEKTUAL MULK VA UCHINCHI SHAXS XIZMATLARI

13.1. Platformaning dasturiy taʼminoti, dizayni, «iDonate» nomi va logotipi, Vidjet shablonlari, matnlari, shuningdek Operator taqdim etgan mem toʻplami Operatorga yoki uning litsenziarlariga tegishli va qonunchilik bilan himoyalanadi.

13.2. Operator Foydalanuvchiga Shartnoma amal qiladigan davrda Platformadan uning vazifasiga muvofiq foydalanish uchun oddiy (nomutlaq), boshqa shaxsga berilmaydigan huquq beradi. Pullik funksiyalardan tashqari bu huquq bepul beriladi. Platformani yoki uning qismlarini nusxalash, oʻzgartirish, dekompilyatsiya qilish, sotish yoki boshqa shaxslarga berish, qonunchilikda ruxsat etilgan hollardan tashqari, Operatorning yozma roziligisiz taqiqlanadi.

13.3. Foydalanuvchi Kontentiga boʻlgan huquqlar Foydalanuvchida qoladi. Kontentni Platformaga joylash yoki yuborish orqali Foydalanuvchi Operatorga uni Xizmatlarni koʻrsatish maqsadida saqlash, unga ishlov berish (shu jumladan formatini oʻzgartirish va TTS orqali ovozlashtirish), Platformada va Vidjetlarda koʻrsatish uchun oddiy (nomutlaq), bepul litsenziyani Kontent Platformada saqlanadigan muddatga beradi.

13.4. Donator Strimerga Xabarni jonli efirda va uning yozuvlarida koʻrsatish uchun oddiy (nomutlaq), bepul va muddatsiz litsenziya beradi.

13.5. Foydalanuvchi Kontentni joylash uchun zarur huquqlarga egaligini va u uchinchi shaxslarning huquqlarini buzmasligini kafolatlaydi. Mualliflik huquqi buzilganligi haqidagi shikoyatlar 12.2-bandda belgilangan tartibda koʻrib chiqiladi.

13.6. Strimer Operatorga oʻzining foydalanuvchi nomi, Kanal nomi va rasmini Platformada (Donat sahifasi, Vidjetlar, strimerlar roʻyxatlari) koʻrsatishga ruxsat beradi. Operator ulardan reklama materiallarida faqat Strimerning alohida roziligi bilan foydalanadi.

13.7. Platforma uchinchi shaxslarning xizmatlari, jumladan Telegram, Google (shu jumladan YouTube API Services) va Twitch bilan integratsiya qilinadi. Ushbu xizmatlardan foydalanish ularning qoidalari bilan tartibga solinadi. Strimer YouTube kanalini Platformaga ulaganda YouTube foydalanish shartlariga (https://www.youtube.com/t/terms) rozilik bildiradi; Google maʼlumotlarga oʻzining Maxfiylik siyosatiga (http://www.google.com/policies/privacy) muvofiq ishlov beradi. Operator uchinchi shaxs xizmatlarining ishlashi va qoidalari uchun javob bermaydi.

14. OPERATORNING HUQUQ VA MAJBURIYATLARI

14.1. Operator: a) Platformaning ishlashini taʼminlash uchun oqilona choralar koʻradi, rejali texnik ishlar haqida imkon qadar oldindan xabar beradi; b) Tariflar va Xizmat shartlarini Ofertada va Platformada oldindan eʼlon qiladi; c) Donatlar haqidagi maʼlumotni Strimerga toʻgʻri va oʻz vaqtida yetkazish uchun oqilona choralar koʻradi; d) shaxsga doir maʼlumotlarga qonunchilik va Maxfiylik siyosatiga muvofiq ishlov beradi va ularni himoya qiladi; e) Foydalanuvchilarning murojaatlarini 21.3-bandda belgilangan muddatlarda koʻrib chiqadi; f) Strimer ulushini ushlab qolmaydi va uning oʻtkazilishiga toʻsqinlik qilmaydi; g) Platforma faoliyatini toʻxtatishdan kamida 30 kalendar kun oldin Foydalanuvchilarni xabardor qiladi.

14.2. Operator quyidagilarga haqli: a) Xizmatlarni takomillashtirish va Platformani oʻzgartirish; b) roʻyxatdan oʻtish va Kanalni tasdiqlash arizalarini tasdiqlash yoki asoslantirilgan holda rad etish; c) identifikatsiya, Kanalga egalik yoki shubhali operatsiyalarni tekshirish uchun qoʻshimcha maʼlumot va hujjatlar soʻrash; d) 6.4-, 12.3-, 17.3- va 17.4-bandlarda nazarda tutilgan choralarni qoʻllash; e) Oferta va Tariflarni 22-boʻlimga muvofiq oʻzgartirish; f) texnik ishlar yoki xavfsizlikka tahdid boʻlganda Platformaning ishlashini vaqtincha toʻxtatish; g) qonunchilikda nazarda tutilgan hollarda vakolatli organlarga maʼlumot taqdim etish.

15. STRIMERNING HUQUQ VA MAJBURIYATLARI

15.1. Strimer quyidagilarga haqli: a) Platformadan Oferta shartlariga muvofiq foydalanish va Donatlarni Strimer hisobvaragʻiga qabul qilish; b) Tariflar, Daraja mezonlari va ularning oʻzgarishi haqida oldindan maʼlumot olish; c) Daraja va Operatorning boshqa qarorlari ustidan eʼtiroz bildirish; d) Xabarlarni moderatsiya qilish vositalaridan foydalanish; e) oʻz shaxsga doir maʼlumotlari boʻyicha Maxfiylik siyosatida koʻrsatilgan huquqlardan foydalanish; f) Shartnomani istalgan vaqtda, shu jumladan oʻzi uchun noqulay oʻzgarishlar kuchga kirgunga qadar bekor qilish.

15.2. Strimer: a) toʻgʻri va dolzarb maʼlumotlarni taqdim etadi; b) 5.4-bandda nazarda tutilgan maqom va Strimer hisobvaragʻini saqlaydi; c) soliqlarni qonunchilikka muvofiq toʻlaydi; d) Oferta, qonunchilik va Kanal joylashgan platformalar qoidalariga rioya qiladi; e) jonli efir mazmuni va unda koʻrsatiladigan Xabarlar uchun javob beradi; f) 5.8-bandga muvofiq hisob xavfsizligini taʼminlaydi; g) Donatorlar haqidagi maʼlumotlarni maxfiy saqlaydi va faqat Platforma doirasida ishlatadi; h) 10-boʻlimda nazarda tutilgan hollarda qaytarishda hamkorlik qiladi; i) Operatorning Shartnomani bajarish bilan bogʻliq soʻrovlariga oqilona muddatda javob beradi.

16. DONATORNING HUQUQ VA MAJBURIYATLARI

16.1. Donator quyidagilarga haqli: a) toʻlovdan oldin Komissiya, yakuniy summa, Limitlar va Toʻlov tashkiloti haqida maʼlumot olish; b) Komissiyani oʻzi toʻlash yoki toʻlamaslikni tanlash; c) ism oʻrniga taxallus koʻrsatish yoki Donatni «Anonim» sifatida yuborish; d) Toʻlov tashkilotidan qonunchilikka muvofiq chek olish; e) 10-boʻlimda nazarda tutilgan hollarda Donat qaytarilishini talab qilish; f) oʻz shaxsga doir maʼlumotlari boʻyicha Maxfiylik siyosatida koʻrsatilgan huquqlardan foydalanish; g) Operatorga murojaat va shikoyat bilan chiqish.

16.2. Donator: a) 4.6-band, 9- va 11-boʻlimlardagi talablarga rioya qiladi; b) Xabar mazmuni uchun javob beradi; c) qonuniy asosda oʻziga tegishli toʻlov vositasidan foydalanadi.

17. SHARTNOMA MUDDATI, TOʻXTATIB TURISH VA BEKOR QILISH

17.1. Strimer bilan Shartnoma nomuayyan muddatga tuziladi. Donator bilan Shartnoma Donat boʻyicha majburiyatlar toʻliq bajarilgunga qadar amal qiladi.

17.2. Strimer Shartnomani istalgan vaqtda Shaxsiy kabinet orqali (bunday imkoniyat mavjud boʻlganda) yoki 25-boʻlimda koʻrsatilgan aloqa kanallari orqali murojaat yuborib bekor qilishi mumkin. Murojaatchining shaxsi tasdiqlangach, Operator hisobga kirishni va Donat qabul qilishni darhol toʻxtatadi, Donat sahifasini oʻchiradi hamda shaxsga doir maʼlumotlarni Maxfiylik siyosatining 17-boʻlimida belgilangan muddatlarda yoʻq qiladi yoki egasizlantiradi. Qonunchilikka koʻra saqlanishi majburiy boʻlgan maʼlumotlar belgilangan muddat davomida saqlanadi. Shu paytgacha koʻrsatilgan Xizmatlar uchun ushlangan Komissiya qaytarilmaydi (FK 707-moddasi).

17.3. Operator quyidagi hollarda Strimer hisobini yoki Donat qabul qilishni vaqtincha toʻxtatishi mumkin: a) firibgarlik, hisobga ruxsatsiz kirish yoki xavfsizlikka tahdid belgilari aniqlanganda; b) sud, vakolatli davlat organi yoki Toʻlov tashkiloti talab qilganda; c) identifikatsiya maʼlumotlari, 5.4-bandda koʻrsatilgan maqom yoki Strimer hisobvaragʻi amal qilmay qolganda; d) 11-boʻlim qoʻpol buzilganda.

Toʻxtatish darhol amalga oshirilishi mumkin; Operator Strimerni bu haqda sababi bilan xabardor qiladi (12.4-band). Toʻxtatish sabab bartaraf etilgunga yoki tekshiruv yakunlangunga qadar amal qiladi; Operator tekshiruvni oqilona muddatda yakunlaydi.

17.4. Operator Shartnomani bir tomonlama bekor qilishi mumkin: a) Strimer Oferta yoki qonunchilikni qoʻpol ravishda yoki ogohlantirishdan keyin takroran buzganda; b) Platforma firibgarlik, jinoiy daromadlarni legallashtirish yoki boshqa jinoiy maqsadlarda ishlatilganda; c) qonunchilik yoki sud qarori talab qilganda; d) Operator Platforma faoliyatini toʻxtatganda — kamida 30 kalendar kun oldin xabar berib.

Operator bekor qilish haqida Strimerga sababini koʻrsatib xabar yuboradi.

17.5. 17.4-bandning «a» yoki «b» kichik bandlari asosida Shartnoma bekor qilingan shaxs Operator roziligisiz yangi hisob ochmaydi va boshqa hisoblar orqali Platformadan Strimer sifatida foydalanmaydi. Bunday shaxs Shartnoma bekor qilingan kundan boshlab bir yil oʻtgach Operatorga qayta roʻyxatdan oʻtish uchun ariza berishi mumkin.

17.6. Operator Donat mablagʻlarini saqlamagani sababli Shartnomani bekor qilish yoki hisobni toʻxtatish Strimer hisobvaragʻiga allaqachon oʻtkazilgan mablagʻlarga taʼsir qilmaydi.

17.7. Shartnoma bekor qilinganda qaytarish (10-boʻlim, 8.6-band), javobgarlik (18-boʻlim), litsenziya (13.4-band) va nizolarni hal qilish (23-boʻlim) boʻyicha qoidalar oʻz kuchida qoladi.

18. JAVOBGARLIK

18.1. Taraflar Shartnoma boʻyicha majburiyatlarni bajarmaganlik yoki lozim darajada bajarmaganlik uchun Oʻzbekiston Respublikasi qonunchiligiga muvofiq javob beradi.

18.2. Operator oʻz aybi boʻlmagan quyidagi holatlar uchun javob bermaydi: a) Toʻlov tashkiloti, banklar va toʻlov tizimlarining harakatlari, shu jumladan toʻlovni rad etish yoki oʻtkazishni kechiktirish (bunday hollarda Operator Foydalanuvchiga Toʻlov tashkilotiga murojaat qilishda yordam beradi); b) uchinchi shaxs platformalari va xizmatlari (YouTube, Twitch, Telegram, efir dasturlari, internet provayderlari) nosozliklari yoki qoidalari; c) Foydalanuvchilar joylagan Kontent — Operator uning qonunga zidligi haqida bilgan, lekin 12.1-bandda belgilangan choralarni koʻrmagan hollar bundan mustasno; d) Foydalanuvchi oʻz Tasdiqlash kodlari, Vidjet havolalari yoki qurilmasini boshqa shaxslarga oshkor qilishi oqibatlari; e) Strimer va Donator oʻrtasidagi munosabatlar, shu jumladan Strimerning vaʼdalari; f) Strimerning soliq majburiyatlari.

18.3. Operator Platformaning uzluksiz ishlashi uchun oqilona choralar koʻradi. Rejali texnik ishlar yoki Operator aybisiz yuz bergan qisqa muddatli uzilishlar Shartnomani buzish hisoblanmaydi.

18.4. Operator Xizmatlarni koʻrsatmaganligi yoki lozim darajada koʻrsatmaganligi uchun Strimerga toʻlaydigan zarar miqdori tegishli Xizmatlar narxining ikki baravaridan oshmaydi (FK 706-moddasining birinchi qismi). Bu cheklov majburiyatni qasddan buzish hollariga (FK 333-moddasining toʻrtinchi qismi) va qonunchilikka koʻra javobgarlikni cheklash mumkin boʻlmagan boshqa hollarga tatbiq etilmaydi.

18.5. Operatorning Donator oldidagi javobgarligi qonunchilikka muvofiq belgilanadi. Oferta Donatorning isteʼmolchi sifatidagi huquqlarini cheklamaydi.

18.6. Foydalanuvchi oʻz aybi bilan Operatorga yetkazilgan zararni, shu jumladan uchinchi shaxslar va davlat organlarining asosli talablari boʻyicha Operator toʻlagan summalarni, qonunchilikda belgilangan tartibda qoplaydi. Operator bunday summalarni Strimerga tegishli mablagʻlardan oʻzboshimchalik bilan ushlab qolmaydi; nizo 23-boʻlimga muvofiq hal etiladi.

19. FORS-MAJOR

19.1. Taraflar favqulodda va muayyan sharoitda oldini olib boʻlmaydigan vaziyatlar (fors-major) sababli majburiyatlarni bajarmaganlik uchun javobgarlikdan ozod qilinadi (FK 333-moddasining uchinchi qismi). Bunday vaziyatlarga, xususan, tabiiy ofatlar, harbiy harakatlar, ommaviy tartibsizliklar, epidemiyalar, davlat organlarining majburiyatni bajarishga toʻsqinlik qiluvchi hujjatlari, elektr taʼminoti, aloqa yoki internet tarmogʻidagi keng koʻlamli uzilishlar, shuningdek oqilona himoya choralari koʻrilganiga qaramay oldini olib boʻlmagan kiberhujumlar kiradi.

19.2. Fors-majorga duch kelgan Taraf bu haqda ikkinchi Tarafni u boshlangan kundan boshlab 5 ish kuni ichida xabardor qiladi. Operator Foydalanuvchilarni Platformada eʼlon joylash orqali xabardor qilishi mumkin.

19.3. Fors-major 30 kalendar kundan ortiq davom etsa, har bir Taraf Shartnomani bekor qilishi mumkin.

19.4. Fors-major olingan mablagʻlarni qonunchilik va Ofertaga muvofiq qaytarish majburiyatidan ozod qilmaydi.

20. SHAXSGA DOIR MAʼLUMOTLAR

20.1. Operator Foydalanuvchilarning shaxsga doir maʼlumotlariga «Shaxsga doir maʼlumotlar toʻgʻrisida»gi Qonun va Maxfiylik siyosatiga muvofiq ishlov beradi. Maxfiylik siyosatida ishlov beriladigan maʼlumotlar toifalari, ishlov berish maqsadlari, maʼlumotlar uzatiladigan shaxslar (shu jumladan xorijiy davlatlardagi xizmat koʻrsatuvchilar), saqlash muddatlari va Foydalanuvchi huquqlari koʻrsatilgan.

20.2. Ofertani aksept qilish orqali Foydalanuvchi oʻzining shaxsga doir maʼlumotlariga Maxfiylik siyosatida koʻrsatilgan maqsadlarda va tartibda ishlov berishga, shu jumladan: a) 9.3-bandda koʻrsatilgan maʼlumotlarni jonli efirda va Vidjetlarda ommaga koʻrsatishga; b) Maxfiylik siyosatida nomlangan xizmat koʻrsatuvchilarga, shu jumladan xorijiy davlatlarda joylashgan xizmat koʻrsatuvchilarga uzatishga rozilik bildiradi (Shaxsga doir maʼlumotlarga ishlov berishning namunaviy tartibining 9-bandi). Rozilikning shakli, amal qilish muddati va qaytarib olish tartibi Maxfiylik siyosatining 1.6-bandida va 17-boʻlimida belgilangan.

20.3. Foydalanuvchi rozilikni Maxfiylik siyosatida koʻrsatilgan tartibda qaytarib olishi mumkin. Rozilikni qaytarib olish unga qadar amalga oshirilgan ishlov berishning qonuniyligiga taʼsir qilmaydi. Shartnomani bajarish uchun zarur boʻlgan maʼlumotlarga ishlov berishga rozilik qaytarib olinsa, Operator tegishli Xizmatlarni koʻrsata olmasligi mumkin. Qonunchilikka koʻra saqlanishi majburiy boʻlgan maʼlumotlar belgilangan muddat davomida saqlanadi.

20.4. Strimerning JSHSHIRi, rasmiy familiyasi, ismi, otasining ismi, telefon raqami va Strimer hisobvaragʻi maʼlumotlari identifikatsiya, hisob-kitob va fiskal cheklarni rasmiylashtirish uchun «Rahmat» xizmati va Toʻlov tashkilotiga Maxfiylik siyosatining 9.2-bandida har bir qabul qiluvchi uchun koʻrsatilgan hajmda uzatiladi va ulardan olinadi.

20.5. Strimer Kanal yurituvchi yoki boshqa shaxslar haqidagi maʼlumotlarni kiritganda ularning (voyaga yetmaganlar uchun — ularning qonuniy vakilining) roziligini olganini tasdiqlaydi.

20.6. Strimer oʻz Kanalida va efir yozuvlarida Donatorlar haqidagi maʼlumotlardan foydalanganda qonunchilikka mustaqil ravishda rioya qiladi.

20.7. Foydalanuvchi Google hisobi orqali kirganda Operator faqat Maxfiylik siyosatida koʻrsatilgan Google hisobi maʼlumotlarini oladi va Google hisobi parolini olmaydi.

21. XABARNOMALAR VA MUROJAATLAR

21.1. Operator Strimerga bildirishnomalarni Shaxsiy kabinetdagi bildirishnomalar, Telegram bot, SMS yoki Strimer koʻrsatgan elektron pochta orqali yuboradi. Donatorga bildirishnomalar u murojaatida koʻrsatgan aloqa kanali orqali yuboriladi.

21.2. Bildirishnoma yuborilgan kuni yetkazilgan hisoblanadi.

21.3. Foydalanuvchilar Operatorga 25-boʻlimda koʻrsatilgan elektron pochta, telefon, Telegram yoki pochta manzili orqali murojaat qiladi. Operator murojaatga 10 ish kuni ichida javob beradi, agar qonunchilikda, Ofertada yoki Maxfiylik siyosatida boshqa muddat belgilanmagan boʻlsa. Qoʻshimcha oʻrganish talab etilsa, Operator bu haqda murojaatchini xabardor qiladi; bunda umumiy muddat 30 kalendar kundan oshmaydi.

21.4. Elektron shaklda yuborilgan bildirishnomalar va murojaatlar yozma shakldagilarga tenglashtiriladi.

22. OFERTAGA OʻZGARTIRISH KIRITISH

22.1. Operator Oferta va Tariflarga ushbu boʻlimda belgilangan tartibda bir tomonlama oʻzgartirish kiritishi mumkin (FK 237-moddasi).

22.2. Ofertaning yangi tahriri eʼlon qilingan sana va kuchga kirish sanasi koʻrsatilgan holda Platformada eʼlon qilinadi. Avvalgi tahrirlar Platformada ochiq saqlanadi. Operator Tariflarning avvalgi qiymatlarini ular amal qilgan davrlar bilan birga saqlaydi va soʻrov boʻyicha taqdim etadi.

22.3. Foydalanuvchi holatini yomonlashtiradigan oʻzgarishlar (shu jumladan Komissiyani oshirish, Limitlarni kamaytirish, bepul funksiyani pullik qilish yoki olib tashlash, Strimer majburiyatlarini koʻpaytirish) Strimerlarga Shaxsiy kabinet va Telegram bot yoki SMS orqali xabar yuborilganidan keyin kamida 30 kalendar kun oʻtgach kuchga kiradi.

22.4. Quyidagi oʻzgarishlar eʼlon qilingan paytdan kuchga kirishi mumkin: a) qonunchilik, sud, vakolatli davlat organi yoki Toʻlov tashkiloti talabi bilan zarur boʻlgan oʻzgarishlar; b) xavfsizlikni taʼminlash yoki firibgarlikning oldini olish uchun zudlik bilan zarur boʻlgan oʻzgarishlar (masalan, ayrim Toʻlov usuli boʻyicha Limitni vaqtincha kamaytirish); c) Foydalanuvchi holatini yaxshilaydigan yoki uning huquq va majburiyatlariga taʼsir qilmaydigan oʻzgarishlar.

Bunday hollarda ham Operator Strimerlarni imkon qadar tez xabardor qiladi.

22.5. Oʻzgarishlarga rozi boʻlmagan Strimer ular kuchga kirgunga qadar Shartnomani 17.2-bandga muvofiq bekor qilishi mumkin. Oʻzgarishlar kuchga kirgandan keyin Platformadan foydalanishni davom ettirish (shu jumladan Donat qabul qilish) Strimerning yangi tahrirni qabul qilganini bildiradi (22.1-band; FK 237-moddasi va 370-moddasining toʻrtinchi qismi). Shaxsga doir maʼlumotlarga yangi maqsadda ishlov berish yoki ularni yangi xorijiy qabul qiluvchiga uzatish uchun Operator alohida rozilik oladi; Platformadan foydalanishni davom ettirish bunday rozilik hisoblanmaydi («Shaxsga doir maʼlumotlar toʻgʻrisida»gi Qonunning 19-moddasi).

22.6. Donatorga Donat yuborilgan paytda amalda boʻlgan Oferta tahriri va Tariflar qoʻllaniladi.

22.7. Oʻzgarishlar ular kuchga kirgunga qadar amalga oshirilgan Donatlarga va toʻlangan obuna davrlariga tatbiq etilmaydi.

23. NIZOLARNI HAL QILISH

23.1. Nizolar muzokaralar yoʻli bilan hal etiladi. Foydalanuvchi Operatorga yozma yoki elektron shaklda talabnoma (pretenziya) yuborishi mumkin; Operator unga 10 ish kuni ichida javob beradi.

23.2. Kelishuvga erishilmasa, nizo Oʻzbekiston Respublikasi sudlarida qonunchilikda belgilangan sudlovlilik va sudga taalluqlilik qoidalariga muvofiq koʻrib chiqiladi. Isteʼmolchi boʻlgan Foydalanuvchi daʼvoni oʻzi yashaydigan joydagi, Operator joylashgan joydagi yoki zarar yetkazilgan joydagi sudga taqdim etishi mumkin («Isteʼmolchilarning huquqlarini himoya qilish toʻgʻrisida»gi Qonunning 29-moddasi).

23.3. Talabnoma tartibi isteʼmolchining sudga bevosita murojaat qilish huquqini cheklamaydi.

23.4. Foydalanuvchi, shuningdek, vakolatli davlat organlariga, shu jumladan isteʼmolchilar huquqlarini himoya qilish va shaxsga doir maʼlumotlar sohasidagi vakolatli organlarga murojaat qilishi mumkin.

24. YAKUNIY QOIDALAR

24.1. Ofertaning biror sharti haqiqiy emas deb topilsa, bu qolgan shartlarning haqiqiyligiga taʼsir qilmaydi.

24.2. Tarafning Oferta boʻyicha biror huquqdan foydalanmasligi undan voz kechish hisoblanmaydi.

24.3. Foydalanuvchi Shartnoma boʻyicha huquq va majburiyatlarini Operatorning roziligisiz boshqa shaxsga oʻtkaza olmaydi. Operator oʻz huquq va majburiyatlarini qonunchilikda belgilangan tartibda, Foydalanuvchilarni oldindan xabardor qilgan holda oʻtkazishi mumkin.

24.4. Platforma va Toʻlov tashkiloti tizimlaridagi elektron yozuvlar Shartnoma bajarilishining dalili sifatida taqdim etilishi mumkin.

24.5. Ushbu tahrir kuchga kirgan kundan boshlab Ofertaning avvalgi tahrirlari, shu jumladan https://idonate.uz/terms-of-service manzilida va Google Docs xizmatida eʼlon qilingan matnlar, oʻz kuchini yoʻqotadi. Ushbu tahrir kuchga kirgunga qadar amalga oshirilgan Donatlarga avvalgi tahrir qoʻllaniladi.

25. OPERATOR REKVIZITLARI VA TOʻLOV TASHKILOTI HAQIDA MAʼLUMOT

Operator

Toʻlov tashkiloti

Pullik funksiyalar uchun toʻlov tizimi: haq olish boshlanganda obuna sahifasida koʻrsatiladi (8.2-band).